【Facebook文章總覽】護膚保養．彩妝．美容（2017．Vol. 3）
2017-10-02
．本文會收錄20篇在面書專頁的帖文
．面書專頁的帖文不會跟本Blog的文章重複
．文字順序為圖片的左上→右上→左下→右下
---------------------------------------------------------------------------------------
▶ 講起台灣必買藥妝，非 Shiseido 豪華級嘉美艷容露莫屬。各大屈臣氏有售，價錢為 HK$30 以下，對於剛冒起／就快爆／已爆嘅痘痘相當有效。濕敷幾分鐘左右，有助加快痘痘生長速度及促進傷口癒合，痘痘肌必備。由於價錢實在太平，加上有人話佢有某種唔安全或較刺激嘅成分，所以我喺危急關頭先會用佢，而且只會用喺痘痘位置，唔會好似化妝水咁全面使用，咁用法嘅話，一支可以用好耐架！
▶ Deep Clean Mask 好少有伏，但 SAMPAR 清爽淨膚面膜係例外。質地好厚，吱出嚟已經覺得好吃力，有時出哂力吱都係乜都吱唔到，有時就吱咗勁多出嚟。而且好難推，要用好多份量先可以完全覆蓋皮膚表面（其實圖中已經用咗好多面膜了，但睇落好似搽得好薄咁）。基本上 5 分鐘已經令面膜乾哂（係咪優點就見仁見智）。清潔度冇乜特別，但售價為 HK$345/50ml ，實在太貴，呢個價錢可以有更好嘅選擇。
▶ 一向對 Cleansing Foam 冇太大好感，總覺得泡沫唔夠綿密，一吱泡沫出嚟已經覺得好鬆散。估唔到 Bifesta 碳酸潔面泡沫改變咗我對 Cleansing Foam 嘅感覺，佢好似平時整蛋糕用嘅忌廉咁，完全唔使加水或用起泡網，泡沫綿密到完全見唔到有氣泡！將適量泡沫放喺面上打圈按摩，基本上指尖同面部肌膚係唔會有接觸，因為中間有超 Creamy 嘅碳酸潔面泡沫隔住，感覺超舒服。最重要嘅係，用完之後塊面滑咗好多，而且一啲都唔乾，簡直係超值價錢加星級潔面享受！
▶ 平時用開嘅粉底停產了，所以要開始尋找代替品。要揾一支啱自己用嘅粉底真係一啲都唔易，買咗唔啱用嘅粉底液，分分鐘用一次就會擺喺度吽塵，所以真係要小心選擇。今次會試吓 KATE 無痕美顏粉底液，試上手已經覺得好神奇，好易推開，好快變成粉狀，好似我以前用開嘅粉底！希望用上面唔會令我失望啦。
---------------------------------------------------------------------------------------
▶ 最近睡眠質素勁差，基本上每晚都會發好多夢，好似冇瞓過覺咁。咁啱呢排開始對香薰產品有興趣，想每日返到屋企可以聞天然香薰，令個人放鬆啲，所以我試吓用 Diffuser 習慣吓先。最後買咗 Lemongrass House 藍洋甘菊 Diffuser，諗住泰國品牌實冇死啦，而且藍洋甘菊有助改善睡眠質素，真係啱哂我。
擺喺睡房幾日，香味已經冇得七七八八。基本上每次都係一入房果吓就會聞到有味，然後就冇味了。就算我調轉籐枝，效果都係一樣。我明白氣味係會因為聞得耐而漸漸消失，但頭幾日已經冇味實在太誇張了。記得幾年前喺同一位置用過 Hallmark Diffuser，味道都 keep 到一段時間，所以我覺得係質量問題，唔關室內面積事。至於睡眠質素，仲係不斷發夢，但好似冇之前咁攰。整體嚟講係麻麻哋，因為我唔係想要一個冇味嘅天然香薰座。
▶ 朋友送贈嘅兩支森田藥粧嘅高純度玻尿酸潤澤原液，不知不覺已經用完一支。一直偏愛冇色透明嘅原液，所以對呢支原液特別有好感。質地易推，吸收度幾好，混合偏乾嘅我用完唔會覺得塊面痴笠笠，之後用面霜或粉底都唔會起碎屑。呢支原液比較適合喺秋天或冷氣房使用，但未必夠力應付乾肌或寒冷天氣。可惜佢宜家唔再出透明版本，所以用埋第二支就冇得再用了。
▶ 自從好耐之前房間疑似有蝨後，我開始用 Fleurance Nature 有機抗菌防護 31 精油噴霧殺滅室內細菌，仲有除臭功效，噴完會覺得間房乾淨啲。噴霧陣味唔係人人接受到，家人覺得佢臭過殺蟲水 10 萬倍，但我用得耐所以習慣了；價錢 HK$185 / 100ml，貴唔貴就見仁見智，我覺得少貴啦，所以會慳住用。
---------------------------------------------------------------------------------------
▶ 過期超過一年嘅 Etude House Hand Bouquet Rich Butter Hand and Heel Cream，諗住用嚟搽手腳，所以過期都冇所謂啦！我對手屬中性膚質，主要係虎口位乾燥。呢支 hand cream 嘅質地唔會好厚，滋潤度正常，用完唔會超級笠。但最令我驚喜嘅係，佢陣味好好聞，完全係我杯茶（唔通係因為過期變咗味所以咁好聞）而且我通常係瞓覺前先用 hand cream ，有自己鐘意嘅香味陪伴入睡，心情都會變好！
▶ 之前又去咗 The Body Shop 買嘢，真係要斬手指。但之前匯豐信用卡 75 折（宜家應該冇折），而且係買屋企冇存貨嘅嘢，唔係唔買呀嘛。
▶ 其實我唔係特別鐘意玫瑰類 skincare，但估唔到咁都俾我喺屋企搵到咁多樣玫瑰產品！
---------------------------------------------------------------------------------------
▶ 由於我懶得洗掃，所以好多時都係用手指上粉底。但最近開始覺得用手上粉底總係覺得差少少，所以揾返支粉底掃上妝。好耐之前喺日本買嘅 Shiseido 131 粉底掃，掃頭有啲細，將粉底推開後會見到有掃痕，所以需要耐性慢慢推勻。完妝後真係覺得底妝比平時貼服好多，但真係要啲時間先可以整走啲掃痕，有時又驚掃掃吓會有擦膠碎出現，所以整體感覺唔係極之良好。
▶ 原價 $598 先買到嘅 The Body Shop 日本山茶花潤膚乳及非洲海檀木身體磨砂，竟然用三百幾蚊就買到，仲送咗個好靚嘅木盒，即刻覺得好抵買！試用完再報告。
▶ 自從用過 AD+ 嘅深層淨膚啫喱，我開始對卸妝啫喱產生興趣，可惜 AD+ 價錢較貴，實在唔捨得日日用，唯有尋找代替品。Bioré 輕感卸粧精華蜜係另一選擇，質地比較厚，唔算好 watery ，但十分易推。過水後，底妝及眉妝已經卸走，肌膚好清爽，唔會覺得繃緊。港幣幾十蚊就有交易，簡直係小資女恩物，不過香港暫時未有得賣，想試就要去台灣及日本入貨啦！
---------------------------------------------------------------------------------------
▶ 平時用開嘅止汗劑係廿幾蚊支嘅開架牌子，好香而且氣味持久，一支用好耐，所以性價比好高。但唔知係咪因為香料定係腋下肌膚本身易敏感，有時會覺得腋下肌膚好痕，抓到紅哂損哂，有時喺公眾場所遇到呢啲情況真係好尷尬。今年終於的起心汗轉用敏感肌膚適用嘅止汗劑，用咗 The Body Shop 蘆薈香體止汗劑一排，暫時冇出現敏感。因為佢冇乜香味，所以一開始會擔心止汗劑唔夠持久，過咗大半日就會有汗味。但去到晚上沖涼前都聞唔到有汗味，所以幾 suprise！
▶ 如果放工後有約會，我都會化個妝先返工，但經過十幾個鐘後，長時間俾化妝品焗住塊面，總覺得化妝後皮膚特別差，所以每次返屋企第一時間做以下步驟，幫肌膚充電：
1. 用一支潔淨度高嘅卸妝產品，用一次就落哂個妝
2. 用潔膚儀作二度清潔，防止底妝殘留喺面上（做咗呢兩步，暗粒已經少咗好多）
3. 用保濕噴霧噴濕塊面，準備敷 mask
4. 敷 paper mask
5. 充電完成
▶ 背脊嘅痘痘最難對付，你好難望到佢生喺邊，更難對症下藥；就算成功用到暗瘡膏搽背脊痘痘，一著返件衫又會整污糟件衫。EAUDE MEDICA 背部袪痘護理液絕對係背脊痘痘嘅剋星，最欣賞佢個類似不求人嘅背部拍，先將化妝棉固定喺背部拍，然後將水狀質地嘅護理液沾濕化妝棉，再輕拍背脊，當中嘅抗菌成分就能滲透至肌膚，從而改善背脊痘痘嘅問題。基本上拍咗幾下再等幾十秒，就會 feel 到背脊好乾爽，真係好方便！
---------------------------------------------------------------------------------------
以下是所有文章總覽，正在持續更新中：
▶ 【自助遊記】我在國外的飲食日誌及行程規劃
▶ 【100%非廣告】我在香港的飲食地圖．內附毒舌食評
▶ 【100%誠實用後感】美妝及保養控必看！我的自購及空瓶分享
▶ 【其他】網購生活．有趣活動．日常雜事⋯⋯
▶ 【Facebook文章總覽】彩妝保養．飲食．旅遊．生活記事……
Follow me ▼
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
Email ▶ fisherpigkt@gmail.com
Blog ▶ https://fisherpigkt.blogspot.com/
Facebook ▶ https://www.facebook.com/fisherpigkt/
Instagram ▶ https://www.instagram.com/fisherpigkt/
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
