【Facebook文章總覽】飲食.食評(2017.Vol. 3)


.本文會收錄20篇在面書專頁的帖文
面書專頁的帖文不會跟本Blog的文章重複
.文字順序為圖片的左上→右上→左下→右下
---------------------------------------------------------------------------------------

▶ 睇返相先醒起原來我唔記得講 Häagen-Dazs 接骨木花黑加侖子雪糕。其實我唔係好知接骨木花係咩味,本來會覺得好接骨木花加黑加侖子會好怪,點知食落又唔錯喎,好似荔枝味咁清新,搞到我好想試玫瑰紅桑子荔枝雪糕。但好似近呢幾個月都唔見有得賣,係咪唔出喇?定係呢兩隻味都係期間限定?

▶ i CREMERiA 宇治抹茶銅鑼燒芭菲杯,重點在於銅鑼燒,餅皮鬆軟,食落有啲彈牙,浸喺半融嘅雪糕都冇完全影響銅鑼燒嘅口感。抹茶雪糕就不過不失,整體嚟講唔算太差。

▶ 聰嫂榴槤水晶珠,雖然好耐冇食,但隱約記得佢有好多水晶珠,雖然冇味,但食落脆卜卜,所以印象好深刻。點知宜家啲水晶珠少咗好多,勁失望,好彩成個甜品有濃郁嘅榴槤味搭夠,所以整體嚟講算係滿意!

▶ 實不相暪,雖然我平時見到 Cookie & Cream 或 Oreo 嘅物體都會秒變心心眼,但我其實係冇食過 Dreyer's 曲奇妙趣㗎。由於佢最近加多咗 33% 曲奇,所以終於引起我嘅注意,買咗盒家庭裝返屋企慢慢嘆。曲奇碎係足夠嘅,但比較軟身,所以唔係好感覺到自己食緊曲奇雪糕。

---------------------------------------------------------------------------------------

▶ 竟然俾我喺 CitySuper 發現紅絲絨味嘅 Oreo!雖然出咗一段時間,但因為好少行 CitySuper 零食部,所以一直都唔知有啲咁嘅嘢。大大包賣成六十幾蚊,其實有啲貴架,但身為 Oreo 愛好者,唔試過唔安樂,仲要係 Cream Cheese 夾心喎,即買!餅乾甜甜哋,有少少酸,感覺似野莓味,不過唔係好脆;夾心方面, Cream Cheese 味道唔算好突出,但冇雲尼拿夾心咁甜,所以幾好食!

▶ 貌似粟一燒嘅卡樂 B Corn-it ,推出菠蘿味及菠蘿味及香辣芝士味。口感同普通粟一燒冇乜分別,雖然食落酸酸甜甜,但略嫌菠蘿味道較淡,都係食返普通粟一燒開心啲。

▶ 卡樂B蝦條出咗珍寶版嘅日式紫菜芥末味,首先有紫菜味已經加分(因為我好鐘意紫菜味零食),而且係珍寶版,即係蝦條體積比平時大,絕對可以滿足「食普通蝦條都覺得唔夠喉」嘅朋友。另一亮點係芥末味,其實我一直好抗拒芥末架,就算食壽司都唔會點芥末,但最近試過芥末味花生,好嗆鼻但又幾過癮,所以開始對芥末味零食有好感🙃呢隻卡樂B蝦條都有芥末味,但唔會勁到有嗆鼻嘅感覺,紫菜味唔算好突出,可能因為被芥末味蓋過!整體嚟講都幾好食,值得回購!

▶ 早排同媽咪去飲茶,你又點會諗到飲個茶都會中伏啫!呢個芋絲南瓜糕令我諗起聖安娜嘅芋絲糕,煎香咗簡直冇得彈,但好明顯係我諗多咗啦!我諗呢個茶樓出品嘅芋絲南瓜糕係有輕輕煎過吓,但食落唔會好脆,粉粉哋唔知想點;上面仲加咗啲蝦米,已經好鹹勁重口味,但中間嘅南瓜茸又甜甜哋,當佢甜食又唔似,鹹食又唔知想點。基本上食半件都已經好漏,最後我頂唔順食咗半件就投降了。

---------------------------------------------------------------------------------------

▶ 去東港城影熊本熊時,順便行吓開咗冇耐嘅一田,見到有超吸引嘅牛奶雪糕就即刻衝去食。開頭以為係百味堂,隔咗幾日先知佢叫都島屋。雖然搞錯咗,但都島屋嘅 Cremia 雪糕都好好食,奶味好重,味道有啲似煉奶,口感 creamy 幼滑,加上用白之戀人做雪糕筒,食完會覺得好幸福!

▶ 新加坡超人氣零食 - 金鴨手工鹹蛋薯片及魚皮終於到港!我勁鐘意食鹹蛋類食品,一聽到香港有鹹蛋魚皮,點可以唔買!雖然銷售地點唔就腳,而且一包要五十蚊都唔平,但一次半次冇所謂啦。買完先知 C 先生早排食過,講到魚皮勁好食,難得佢咁欣賞,咁就同 C 先生一齊食啦。
先講薯片,我手上嗰包好碎,口感已經差少少;雖然有少量完整薯片,但我略嫌佢薄得濟。鹹蛋香比我相像中少,食落仲甜甜哋,一開始覺得好唔夾,但食食吓又冇乜嘢喎。
至於魚皮,我哋一致認為魚皮係好食啲。冇薯片咁易碎,每塊魚皮都痴到唔少鹹蛋黃;而且唔係好甜,食落仲有少少辣,唔怪得 C 先生食唔停啦(註:佢平時好少食零食,每次最多淨係食幾塊薯片。事前佢話最多食三塊魚皮,結果佢食咗十塊以上)
結論:魚皮真係好好食,好彩佢唔算平,而且唔易買,否則我一定會成日買嚟食!

▶ 其實我對朱古力唔係特別有興趣,但之前經過 CitySuper 時,見到有好多朱古力脆脆,唔知點解突然好想食。買咗包海鹽焦糖味脆脆, Size 好似薯片咁,但比較厚身,食落有少少鹹,但甜味同朱古力味都係佔咗大部分。朱古力愛好者可以一試!

▶ 麥當勞又出 Shake Shake 薯條啦!今次冇咗我最鐘意嘅和風紫菜,諗住試吓 TABASCO® 啦!去到先知原來可以揀美式 BBQ 蜜糖味,所以轉軚揀蜜糖味。果然冇令我失望,甜甜哋好好食!

---------------------------------------------------------------------------------------

▶ 諗住去七仔買盒檸檬茶時,俾我發現 Topicana 出咗桃と乳酸菌。桃同乳酸菌都係我鐘意嘅口味,點可以唔買!甜度方面,我覺得啱啱好,唔會一味得個甜字,香桃味都幾明顯,加埋乳酸,感覺好清新!

▶ 試咗十幾款 Oreo 飲品,都係 HeSheEat 嘅 Oreo Milkshake 最得我心。佢真係有加埋 Oreo 同奶昔一齊打,一路飲一路食到唔少餅碎,唔似得其他餐廳將塊 Oreo 餅乾擺入杯飲品就收工。雖然市面上好飲嘅 Oreo Drinks 少之又少,但我會繼續嘗試,希望可以揾到有 HeSheEat 水準嘅 Oreo 飲品!

▶ 無論是原味或淡鹽味,每次吃這個牌子的粟米筒都會食個不停。早前更推出蛋黃醬味,差點一個人吃光一整包。蛋黃醬味不算十分濃郁,但我覺得味道剛剛好,否則會變成重口味的零食了!

▶ 中秋節快樂!自從知道螢光棒對地球造成很大傷害後,我已經有幾年沒有玩螢光棒了。其實慶祝中秋節可以有很多方法,例如跟親朋戚友一同吃月餅賞月。未知大家今年吃了什麼品牌的月餅呢?說實話,今年我沒有吃月餅,雖然不是月餅控,但覺得總要吃月餅才算過中秋。剛巧 C 先生對月高陞的金絲千層奶皇月餅有興趣,而且竟然被他發現在中秋前幾天還可以在網上購買,所以他買了一盒給我家。月高陞由前半島酒店嘉麟樓的中菜部點心策劃 - 葉潤發師傅創辦,他以前是望月的顧問,可想而知月高陞會有一定的水準,所以我和 C 先生十分期待!

---------------------------------------------------------------------------------------

▶ 沒想到中秋節晚上會和 C 先生及他的親友來一個「月餅試食大會」。可能是我講了三十次「今年沒有吃過月餅」,所以要一次過吃七款月餅滿足我的心願。七個成年人試了七款月餅,儘管每人只試每款的八分之一或四分之一,但在一個晚上吃七款月餅實在太瘋狂了!比較有印象的月餅有:
1. 東海堂抹茶流心月餅 - 抹茶味突出但餅皮較厚和不夠Q彈
2. 肉桂狗紫薯月餅 - 紫薯味極濃郁,以卡通月餅來說已經很好
3. 潮式綠豆月餅 - 酥皮加綠豆餡,跟傳統月餅不一樣
雖然一次過吃七款月餅令體重直線上升,但能夠大伙兒聚在一起賞月吃月餅,體重上升也是值得的!

▶ 話說某天晚餐後想吃甜品,找好幾間甜品店,但大多都關門了(當時只是十時多)。原打算回家算了,無謂再花時間找未關門的甜品店,最後 C 先生帶我到 Joyful Dessert House,在銅鑼灣開分店實在是港島人的福音!今次點了夏之菠蘿芭菲,我覺得 Joyful Dessert House 的雪糕好像進步了,口感比以前的黏(是我喜歡的類型)。忌廉感覺是室溫忌廉,有點怪怪的,但口感綿密。中間有菠蘿爆珠及菠蘿肉,前者的菠蘿味比較人工;後者不夠爽甜,但不會太酸。最底層舖滿不少椰果。個人最喜歡頂層的雪糕和忌廉,外賣價 $33,價錢尚算合理;但堂食的話,相信會有更好的選擇。

▶ 由於要抓著 Shake Shake 薯條的尾巴,所以幾天前又到了麥當勞。今次試了煙燻辣椒仔調味粉,聽說評價一般,所以我沒有太大期望。味道像珍珍煙肉味薯圈,沒有想像般奇怪,但當然是和風紫菜最美味!

▶ 終於有 Häagen-Dazs 外賣雪糕買一送一啦!以為上星期已經開始,結果白行一趟;今次終於沒有白行了!分別點了情濃比利時及法式情迷(總覺得名字有點怪怪的),雪糕球有:士多啤梨芝士餅、意大利芝士餅、香草焦糖朱古力蛋糕及黑朱古力杏仁(名字太長所以記不清)。我最喜歡士多啤梨芝士餅,酸酸甜甜而且有頗突出的芝士餅味,感覺清新;黑朱古力杏仁有不少朱古力粒,增添雪糕的口感。除了雪糕球,還有 waffle、brownie、馬卡龍及棉花糖等配料,令整個甜點變得更豐富,值得再試!

---------------------------------------------------------------------------------------


以下是所有文章總覽,正在持續更新中:
【自助遊記】我在國外的飲食日誌及行程規劃
【100%非廣告】我在香港的飲食地圖.內附毒舌食評
【100%誠實用後感】美妝及保養控必看!我的自購及空瓶分享
【其他】網購生活.有趣活動.日常雜事⋯⋯
【Facebook文章總覽】彩妝保養.飲食.旅遊.生活記事……

Follow me ▼

*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
Email ▶ fisherpigkt@gmail.com
Blog ▶ http://www.fisherpig.com/
Facebook ▶ https://www.facebook.com/fisherpigkt/
Instagram ▶ https://www.instagram.com/fisherpigkt/
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*

Comments