．本文會收錄20篇在面書專頁的帖文
．面書專頁的帖文不會跟本Blog的文章重複
．文字順序為圖片的左上→右上→左下→右下
---------------------------------------------------------------------------------------

▶ 呢幾日終於感受到冬天嘅來臨，最適合打邊爐。上星期去咗百味王火鍋酒家打邊爐，因為唔係任食，所以食材較新鮮。個人比較喜歡四寶丸、雲吞及水餃，當然唔少得我最喜愛嘅豆卜，索哂湯底嘅豆卜超入味，唔使點其他醬料已經好好食！特別介紹炸芋頭片，因為芋頭有炸過，所以擺落湯底唔會煮到溶哂，芋頭控表示滿足。不過肉類同蔬菜成日煮到爛哂，肉類變成入口即溶，失去應有嘅彈牙口感，有少少扣分呢。

▶ 上星期食滯咗，係時候食啲light少少嘅嘢。Grove Sandwiches嘅蟹棒配蟹子螺絲粉沙律係我嘅至愛，次次食完都好有罪惡感（因為有邪惡嘅沙律醬），蘋果粒夠爽甜，加埋蟹棒同螺絲粉都幾match。如果冇咗提子乾，成件事會變得更美好！

▶ 對我嚟講，士多啤梨只有3種，就係甜、酸、唔甜唔酸。呢盒3色士多啤梨（個名係我亂作嘅）係我近年嚟食過最香甜嘅士多啤梨！打開包裝紙已經有好清新嘅香味，食落唔會好酸，但又唔會一味得個甜字，超～好～食～當然一分錢一分貨，間唔中食一次已經覺得高興！

▶ 瑞士蓮朱古力有咁多口味，我最鐘意食啡色嗰隻，因為我偏愛有堅果嘅朱古力，而啡色嘅榛子軟心朱古力滿載柔滑嘅軟心加榛子碎，質感細膩同時有咬口，所以我俾10個讚！

---------------------------------------------------------------------------------------
▶ 甜點是枯燥生活的調味劑：）

▶ 自從喺首爾餐餐食泡菜，我慢慢開始鐘意食呢種凍冰冰又辣辣哋嘅嘢。見到栗一燒出咗韓風泡菜味，OK 便利店買只需HK$6.5，緊係要買嚟吓。食落酸酸哋，仲有少少辣，但味道唔係好似泡菜。我覺得當做普通零食都 OK，但泡菜愛好者可能會覺得失望呢。

▶ 【沒有咖啡的早上．第一天】近年每日返工都要飲杯咖啡先安樂。其實心知日日飲咖啡唔係咁好，但呢個心癮真係好難戒。但為咗牙齒著想，唯有忍痛同咖啡 Say Goodbye。結果維他奶陪我渡過第一個冇咖啡嘅早上。

▶ 又到甜品時間，本來諗住去 Via Tokyo 食抹茶雪糕，點知發現 Via Tokyo 出咗新產品 - 四重芝士軟雪糕，芝士控點可以唔試🧀實物係加咗少少藍莓醬，雪糕依舊 creamy 柔滑；雖然有四種芝士，但味道唔會好複雜，芝士味幾濃，食食吓覺得有少少似乳酪味，清清哋唔會好膩，整體嚟講都幾好食。

---------------------------------------------------------------------------------------
▶ 香芋批又返嚟啦！每年出現香芋批都要食返一次先滿足，不過今年好似加咗價，仲冇以前咁好食，雖然味道冇乜分別，但芋頭餡嘅醬好似太「結」，有啲似鼻涕=0=

▶ 今日係3月14日白色情人節。十字牌推出期間限定嘅白朱古力牛奶飲品。雖然之前個綠茶牛奶飲品伏到不得了，但我仍然無懼挑戰白朱古力奶。結果搵咗好多間便利店先買到，唔通真係好好飲？本身唔抗拒白朱古力，亦有「白朱古力奶甜到不得了」嘅心理準備，結果......真係甜嘅，飲到一半而且覺得好滯，名副其實「甜到漏」呀！

▶ 雖然我對酒精產品冇乜興趣，但間唔中都會想飲有少量酒精濃度嘅飲品🥂喺超市見到SUNTORY乳酸酒，見到「乳酸」呢個 term 即刻雙眼發光，加上只有3%酒精濃度，即買！味道唔會好甜，酒味唔重啱哂我，但乳酸味都唔算好突出，相比之下可爾必思氣泡酒嘅乳酸味會明顯啲，但整體感覺幾清新，偶爾飲吓都唔錯。

▶ 營多撈面食得多，味精都唔少，食到一半要狂飲水。原來營多撈面味薯片都差唔多，因為味精作怪，所以一開頭覺得幾惹味，不過愈食愈辣，辣到搶哂啲味呢。

---------------------------------------------------------------------------------------
▶ 天仁茗茶珍珠奶茶半甜走冰永遠係我最愛。最鐘意佢嘅珍珠 size 適中，超Q彈而且甜甜哋勁好食，幾個月先飲一次實在太耐啦！

▶ 喺屋企搵到疑似冇得賣嘅卡樂B避風塘炒蝦味蝦條，有少少辣但接受到，雖然唔覺得佢有避風塘炒蝦嘅風味，但唔會太重口味，結果我食到停唔到口，希望佢會再出啦。

▶ 麥當勞最新推出嘅朱古力芭菲 x Oreo，簡單嚟講即係走花生嘅多醬朱古力新地（長大版）加 mini OREO 同 OREO 威化棒。因為一直食開有花生嘅朱古力新地，所以就算今次有 OREO 加持，食完不禁有一絲失落感。首先咁大杯雪糕但得3塊 Mini OREO 未免太少；威化棒食之無味，唔要都罷；而且食到最底有好多朱古力醬，嗜甜如我今次都頂唔順。如果可以俾我再揀多次，我會先買杯裝 Mini OREO，再買多花生嘅朱古力新地，然後喺新地瘋狂加上 Mini OREO，咁會開心好多。

▶ 最鐘意一個人食元氣，次次去都係食嗰幾款：炸蝦卷、炸墨魚嘴、辣味三文魚軍艦、元氣卷同炸軟殼蟹手卷真係冇得輸👍🏻加埋沙律醬就 perfect 池！

---------------------------------------------------------------------------------------
▶ 呢包不知名嘅煙肉味餅乾係屋企人喺芬蘭帶返嚟嘅手信。包裝平平無奇諗住冇乜料到，點知屋企人話超級好食，極力推薦。本來我覺得佢哋太誇張，講到包餅乾好似會好食到飛天咁，但試咗一塊之後，又真返唔到轉頭。煙肉味好濃郁，像真度高達95%；餅乾比較鬆脆，食咗好似冇食過嘢咁，所以不知不覺掃咗半包。第二日已經俾屋企人食哂了，唔知香港有冇得賣呢？

▶ 點解人哋買嘅手信總係好食啲！今次係來自首爾樂天市場嘅朱古力，之前去首爾冇買，返到香港先收到家人嘅朱古力手信，不禁慨嘆我冇喺樂天市場瘋狂掃貨朱古力外層、內層有果仁碎同疑似拖肥嘅物體，食落煙煙韌韌，好滿足（因為我好鐘意食煙韌嘅嘢）如果大家知道香港邊度有得賣呢隻朱古力，歡迎報料，感激不盡！

▶ 身為 Oreo / Cookie & Cream 愛好者，對於任何有 Oreo / Cookie 嘅食物都好有興趣。所以當見到雀巢 DRUMSTICK 甜筒推出曲奇忌廉味嘅時候，即刻變咗心心眼！但我覺得 Cookie & Cream 嘅味道只限於 Topping 較大塊嘅曲奇碎，雖然 Topping 下嘅雪糕混合唔少細曲奇碎，但 Cookie & Cream 嘅味道唔算好重，感覺似食雲尼拿雪糕多啲，所以有少少失望呢！

▶ RISKA 抹茶脆脆，仲諗住口感比較扎實，點知係走香脆鬆化路線，因為同想像有出入，所以一開頭係有啲失望㗎。食食吓先發現脆脆外層好似有一層抹茶朱古力，所以整體感覺 creamy，而且抹茶味道濃郁，所以又係好食到停唔到口！

---------------------------------------------------------------------------------------


以下是所有文章總覽，正在持續更新中：
▶ 【自助遊記】我在國外的飲食日誌及行程規劃
▶ 【100%非廣告】我在香港的飲食地圖．內附毒舌食評
▶ 【100%誠實用後感】美妝及保養控必看！我的自購及空瓶分享
▶ 【其他】網購生活．有趣活動．日常雜事⋯⋯
▶ 【Facebook文章總覽】彩妝保養．飲食．旅遊．生活記事……

Follow me ▼

*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
Email ▶ fisherpigkt@gmail.com
Blog ▶ https://fisherpigkt.blogspot.com/
Facebook ▶ https://www.facebook.com/fisherpigkt/
Instagram ▶ https://www.instagram.com/fisherpigkt/
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*