【Facebook文章總覽】護膚保養.彩妝.美容(2017.Vol. 1)


.本文會收錄20篇在面書專頁的帖文
面書專頁的帖文不會跟本Blog的文章重複
.文字順序為圖片的左上→右上→左下→右下
---------------------------------------------------------------------------------------

▶ 天氣開始轉冷,保濕精華係時候要出動。Olecule防敏水潤精華除咗保濕,仲有抗菌消炎功效,膚質屬混合偏乾嘅我都唔會覺得痴笠笠,仲唔會出現擦膠碎添!

▶ Uriage SOS急救面膜好似clay mask嘅迷你版,質地厚身但易推,但唔會好快變乾。我會喺剛冒起嘅暗瘡搽多少少,可以加快暗瘡嘅生長速度(例如:由石頭瘡變為有膿嘅痘痘);亦會喺暗瘡傷口厚敷,令傷口快啲癒合。用左2-3個月,仲係好work,like!

▶ 用咗Clinique聲波淨透潔膚儀都有1年幾,整體感覺幾好,但用得耐個刷毛會變得粗糙,「吉」住塊面好唔舒服,所以必須定期更換刷頭。上星期去Clinique專門店配刷頭,竟然有孖裝!由原價HK$220/個,變成HK$350/2個!記得幾個月前係冇孖裝,所以今次見到呢個優惠,二話不說立即入手:)

▶ Innisfree控油礦物質散粉,識用一定係用嚟做dry shampoo!細細盒方便帶出街,個頭開始笠就拍幾拍,即刻乾爽返!

---------------------------------------------------------------------------------------

▶ 曼秀雷敦Melano CC系列美白淡斑維C精華, 質地較稀,但推開後油油哋,混合及油性肌膚可能覺得笠,所以我通常喺臨瞓前搽少少喺暗瘡印。雖然唔係好鐘意個texture,但搽咗2個星期左右,新痘印明顯變淡,舊痘印都淡咗少少,效果幾好,所以我會keep住用呢!

▶ 前年去台灣旅行時,發現DR.WU有增量裝,因為我膚色比較暗啞,加上用咗幾年DR.WU,覺得幾好用,所以一見到支VC微導美白精華乳有成200ml,仲抵過買正常size,我諗都冇諗就帶佢返香港(宜家好似出咗新一代了,包裝都唔同咗)。留意返,佢係1支200ml嘅乳液!其實我淨係夜晚用美白產品,到底我要用幾多個晚上先用完呢

▶ 終於俾我揾到BB頭面膜套裝喇!包括Barrier Repair三重補濕彈力面膜(極潤)10片及Bifesta碳酸潔面泡沫40g試用裝,零售價大約$110,萬寧特價$85左右,加上會員喺指定日期9折,抵上加抵!

▶ 之前用過自白肌嘅洗面乳、爽膚水及面霜,保濕得嚟唔會令肌膚痴笠笠,所以我對佢嘅玻尿酸水感保濕防曬乳SPF50+好有興趣。水感透薄嘅白色乳液質地,好易推開,唔會令肌膚泛白。吸收度方面,我就覺得麻麻哋喇。秋冬使用都會覺得有啲黏,唔夠清爽,對於混合肌嘅我嚟講扣咗唔少分,所以用咗1/3支就忍痛說再見了。

---------------------------------------------------------------------------------------

▶ 唔知有冇人同我一樣會帶保濕噴霧去做運動?有時喺gym room做運動做到滿頭大汗/出面油/紅都面哂嘅時候,我都會用保濕噴霧噴一噴,等十幾秒後再抹走面部多餘水分,塊面即刻清爽哂,仲有cool down作用.呢排用緊La Roche-Posay噴霧,噴咀細小易按,一按即有大量水珠,霧化效果理想! (因為用過一啲spray個噴咀好廢,所以噴咀易按係好重要)

▶ 每次見到product用到見底就好有滿足感。今次用清嘅產品係Faith in Face清爽保濕卸妝潔膚水,我主要用嚟落無色防曬,所以唔知潔淨度有幾強。用完覺得塊面好保濕,但唔會痴笠笠,而且唔會有刺痛感(唔係講笑,有啲卸妝水真係會令到塊面吉吉哋)。原價HK$75/300ml,online store宜家買一送一,超抵買!

▶ 之前分享咗開架底妝品,今次就講吓專櫃化妝品。MAKE UP FOR EVER PRO FINISH係補妝必備,以前會覺得用粉餅直接補妝會令妝容厚重,即刻變成面具人;又或者會乾到甩皮,總之令到成個妝都好唔貼服。但MAKE UP FOR EVER PRO FINISH粉質幼細,輕拍一層,個妝即刻變返貼服啞緻,效果自然又唔會好乾,所以控油偏乾嘅我表示好滿意。

▶ 實不相暪,我以前懶到一個禮拜只係敷1-2次面膜,但最近勤力咗,因為我發現敷面膜係塊面最 relax 嘅時候!早排攰到連塊面都覺得好攰(唔知點形容,總之就覺得好繃緊好唔舒服),又因為當時攰到唔想搽護膚品,所以我平時沖完涼會先用 Spray 噴吓塊面,然後直接敷面膜。可能因為面膜有精華液,比較凍冰冰,所以敷面膜時塊面涼浸浸好舒服🌬敷完會覺得好水潤,即刻冇咁攰!

---------------------------------------------------------------------------------------

▶ 我成日覺得旅行係體力大挑戰,行足超過12小時不在話下,長時間孭住個袋會覺得膊頭負擔愈來愈重,又攰又緊。之前喺日本發現 MegRhythm 除咗有溫熱眼膜,仲有蒸氣溫熱安睡貼,我會喺瞓覺前貼喺膊頭,左右各一塊,膊頭果然鬆返,真係好 relax!由於每次嘅使用量比官方說明多,所以返到香港要慳住用。後來見到香港都有得賣,從此 MegRhythm 蒸氣溫熱安睡貼成為家中嘅必需品!

▶ Collect Point 大減價冇收獲,唯有轉戰買化妝品(呢2樣嘢有關係㗎咩=0=)。喺事前冇做資料搜集嘅情況下,全憑直覺買咗呢堆嘢,唔知效果如何呢?

▶ 寵愛之名 - 多胜肽緊緻全能眼霜,一聽個名就知佢係多功能嘅抗老眼霜。少少厚身嘅乳霜狀質地,推開後覺得滋潤,我反而好鐘意呢種滋潤感(只限眼肌,如果面部肌膚用太潤嘅嘢我會頂唔順)。黑眼圈冇得到明顯改善,因為係天生嘅所以搽乜都冇用,至於去紋緊致,暫時未有顯著功效,但我用呢瓶 Eye Cream 主要係預防眼部問題,所以整體嚟講尚算滿意。

▶ 記得以前喺台灣嘅時候,一個人好難日日開洗衣機,外套更難著一次洗一次,對於輕度潔癖嘅我嚟講,真係幾困擾。所以當我發現熊寶貝衣物清新噴霧嘅時候,簡直係眼前一亮。氣味持久,有啲似柔順劑同洗衣液嘅混合體,噴完之後,第二日仲可以聞到熊寶貝嘅香味。BBQ/打邊爐後噴一噴,油煙味即刻冇哂,所以宜家會擺定一兩支喺屋企,以備不時之需。

---------------------------------------------------------------------------------------

▶ 本身想買大地色眼影看門口,但 Heroine Make 持久亮澤寶石眼影嘅04玫瑰酒紅實在太靚,忍唔住帶佢返屋企。左上角係 Eye base,質地柔滑,珠光感有助打亮眼部輪廓。另外三隻顏色都算顯色,而且唔會飛粉,感覺不錯!

▶ 自己搽指甲油,十次有九次都失敗,一係甲油唔夠上色,要搽多幾層先顯色,搞到愈搽愈厚好難乾;一係搽出界;一係未乾就揩花咗⋯⋯連普通甲油都搞唔掂, Gel 甲更加唔使諗.但 Sally Hansen 指甲油有好多隻色,喺屋企都做到 Gel 甲效果,結果我忍唔住買幾支返屋企試吓。到底我做唔做到 Gel 甲效果呢?

▶ 天氣潮濕悶焗,代表夏天好快來臨,係時候要脫毛了.雖然市面上有唔少家用脫毛機,但我實在太怕痛,所以 keep 住用剃刀。呢個係回購咗好多次嘅 Schick 女士除毛刀,有舊肥皂嘅物體痴住刀頭,沖涼順便剃毛,舊肥皂會 keep 住起泡,唔會好似一般剃刀咁用完乾爭爭,都幾方便㗎!唯一缺點係唔可以成日用,始終會愈剃愈粗同生得愈快。

▶ 日本超人氣手信 - DHC Lip Cream,日本買嘅話港幣30幾蚊就有交易,氣味唔討好,潤得嚟有啲油,搽完個咀會令令哋。因為我唔係好鐘意油感較重嘅潤唇膏,所以用完呢支唔會回購了。

---------------------------------------------------------------------------------------


以下是所有文章總覽,正在持續更新中:
【自助遊記】我在國外的飲食日誌及行程規劃
【100%非廣告】我在香港的飲食地圖.內附毒舌食評
【100%誠實用後感】美妝及保養控必看!我的自購及空瓶分享
【其他】網購生活.有趣活動.日常雜事⋯⋯
【Facebook文章總覽】彩妝保養.飲食.旅遊.生活記事……

Follow me ▼

*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
Email ▶ fisherpigkt@gmail.com
Blog ▶ https://fisherpigkt.blogspot.com/
Facebook ▶ https://www.facebook.com/fisherpigkt/
Instagram ▶ https://www.instagram.com/fisherpigkt/
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*