【Facebook文章總覽】護膚保養.彩妝.美容(2017.Vol. 2)


.本文會收錄20篇在面書專頁的帖文
面書專頁的帖文不會跟本Blog的文章重複
.文字順序為圖片的左上→右上→左下→右下
---------------------------------------------------------------------------------------

▶ 【空瓶見證】一支每日都用、用咗超過半年、屋企有接近一打存貨嘅女性潔膚液,冇舖天蓋地嘅宣傳,亦都唔係間間萬寧都有,我甚至成日唔記得佢叫咩名,但已默默陪伴咗我一段時間。可能你會覺得每個牌子嘅女性潔膚液都差唔多,但我用過某大牌子嘅潔膚液會覺得唔舒服,所以遇上呢支女性潔膚液後,我應該唔會再轉會了(除非有一日我會對佢敏感啦)。

▶ 上月頭喺0 research 嘅情況下去莎莎買化妝品,行咗十幾個圈後終於有收獲,連眉粉都揀咗好耐。千挑萬選下終於揀咗 KATE 造型眉彩餅,因為見到佢眉粉鼻影二合一,又有三隻色好似好抵。事後先知原來好多人有用呢。我通常會溝最深色同中間色,掃上手背然後再掃喺眉毛,直接掃眉毛會變咗粗眉嘅朋友。我覺得佢幾上色,而且容易掌握,我呢種新手用都冇問題呢。

▶ Dr. Jou 正式登陸香港!原來佢係森田藥粧集團旗下嘅醫美級品牌,一用有用森田藥粧,當然要試吓 Dr. Jou 有咩特別。首先係1片面膜有5個功效:化妝水、精華液、精華乳、面膜及眼膜,洗完面敷面膜就完成護膚程序。第二係面膜面積較大,終於可以覆蓋成塊面;佢嘅紙質唔會太薄,冇森田藥粧咁易撕爛。另外,32g精華液超足料,敷完面再敷頸都得。價錢方面比森田藥粧貴少少,大約$10/片,雖然比森田藥粧貴,但值得購入。

▶ Sally Hansen Miracle Gel 係幾好嘅。掃頭較闊,一搽已經覆蓋90%指甲表面,搽一層已經好實色,技術好嘅話可以唔使搽多層添!之後用埋 Miracle Gel Top Coat 就會有 Gel 甲效果,而且好 long-lasting,搽完之後嗰日仲搬好多嘢,但都 keep 到幾日冇甩冇花。我手上呢支係210 All Chalked Up,係粉紫色,啱哂春天用。

---------------------------------------------------------------------------------------

▶ 混合偏乾嘅我最怕防曬痴笠笠、泛白同有擦紙膠碎,好彩 Kanebo Allie UV Mineral Moist NEO SPF 50+ PA++++ 冇以上問題。佢話自己係啫喱狀質地,我覺得似乳液多啲,好易推開同吸收。最令我驚喜係用完之後好清爽,爽到好似冇搽過防曬咁,就算潮濕天氣用都冇事,一試愛上。不過我呢支防曬已經買咗一段時間,唔知宜家有冇轉包裝呢?

▶ 早排想買支有色潤唇膏旁身,最後揀咗曼秀雷敦水彩潤唇膏。搽上咀同一般潤唇膏冇分別,夠滋潤;而呢隻 03 Fantasy Pink 係好淡好淡嘅紅色,唔係粉紅或橙 tone。左下角嘅試色圖係搽好幾次嘅效果,如果你想要搽一次就好顯色嘅潤唇膏,呢隻應該唔適合了。但因為我想化淡妝時為咀唇加返少少血色,所以我覺得曼秀雷敦水彩潤唇膏都唔錯呢!

▶ 【空瓶見證】可以令我 keep 住日日用嘅 product 唔係好多,SAMPAR 美肌保濕噴霧係其中之一!我會擺一支喺 office,除咗保濕及舒緩敏感,另一個賣點係「喚醒疲倦肌膚」,做嘢做到攰就噴一噴,放工前又噴吓,淡淡玫瑰花香好舒服,成個人即刻精神返!

▶ 近來喜愛嘅潔面產品 - 來自法國 Fleurance Nature 嘅 Purifying Cleansing Gel 。蘊含有排毒功效嘅牛蒡成分,質地偏水狀,就咁用雙手好難搓出綿密泡沫,以為咁樣會洗得唔乾淨?我覺得清潔度幾好,用完之後冇哂面油,塊面好清爽,但唔會好乾,所以我已經買咗第二支啦!

---------------------------------------------------------------------------------------

▶ 把心一橫將呢排用緊嘅護膚品同 sample 放入櫃桶,廢事再舖塵。啲 sample 多到呢……我諗夠用1年了。其實我已經好耐冇拎 sample,點解仲係有咁多=0=

▶ Deep clean mask / Peeling gel 就用得多,可以撕落嚟嘅 Peel off mask 真係比較少見。belif First Aid – Transforming Peel off Mask 蘊含白楊柳成分,有效去除肌膚老廢角質及調理油脂分泌。只要薄搽一層並等10分鐘,等到面膜乾哂就可以加水清洗,面膜會自動脫落㗎喇。敷面膜時會有少少吉面,不過好快會冇事,過水後冇過敏。但千祈唔好貪心敷勁厚面膜,我之前就係試過敷得太厚,所以等咗好耐面膜都唔乾呢!

▶ 每到星期五,心情特別好,特別有意欲敗家。但今次冇亂買嘢㗎,樣樣都係屋企短缺嘅嘢:身體磨砂、控油精華同爽膚水等等⋯⋯等我用返一排再分享用後感先。

▶ 諗住平平哋去萬寧/屈臣氏買身體磨砂,點知勁少選擇,主要係自家品牌。千挑萬選下買咗 The Body Shop 英倫玫瑰身體磨砂膏。我唔係特別鐘意玫瑰味產品,就咁打開蓋聞好似好俗好大味,但過水後味道變淡,又幾好聞喎!粒子唔算粗,加上佢係啫喱 texture,所以好易推,磨完之後成身滑哂,即刻覺得搽 lotion 吸收得好快。價錢HK$209/250ml,以專門店嚟講佢係幾抵買!

---------------------------------------------------------------------------------------

▶ 最鐘意去旅行買香港冇嘅護膚品。之前喺台灣買嘅肌研 Hada Labo 控油護理化妝水專為「不安定/問題肌」而設,香港版本話有效鎮靜肌膚、抑制粉刺同調理水油平衡;台灣版本話可以改善粗荒、油光、暗沉等問題,調理肌膚至健康狀態👀唔理香港定台灣版本,總之就咁睇啲字就知佢擺明為我而設(因為我塊面長期處於泛油及暗啞狀態,間唔中會敏感)!上個月開嚟試用,冇乜香味或酒精味,唔會刺激皮膚,亦唔會搞到塊面笠痴痴。呢個天氣用好適合。最近發現原來香港都有得賣啦,第日要回購會更加方便!

▶ Bioré 係我愛牌之一,用過防曬、卸妝、洗面同沐浴產品,大部分都好用,性價比高,所以當我選擇防曬噴霧時,二話不說買咗Bioré 長效清爽防曬噴霧。戶外時用喺手、腳同頸,50g 大約用到4-5次,如果要隔幾個鐘補噴一次,基本上一支最多只用到2日。雖然噴完唔會令肌膚泛白,但略嫌有啲痴笠笠,唔夠清爽,夏天用應該會周身唔自在,所以應該唔會回購了!

▶ 能夠喺零收穫嘅情況下離開 Sogo,真係少啲定力都唔得呀痴線!

▶ 剪髮後,頭髮去到膊頭左右,呢個長度搞到髮尾成日向外彎,真係好麻煩。唯有每日用直髮夾將髮尾向內捲,但效果唔夠自然同持久。咁啱見到 Philips 出咗 StyleCare 自動旋轉熱風梳,睇落好似幾方便易用。原價 HK$698 , logon 買有 95 折(但優惠好似完咗),用埋仲有三百幾蚊嘅 Citysuper 禮物卡,最後用咗 HK$312 帶佢返屋企,足足平咗一一半有多!試用一段時間再同大家分享用後感!

---------------------------------------------------------------------------------------

▶ 終於開始用喺台灣買嘅 Neogence 粉刺溶解精華喇!事前好興奮,因為對呢個牌子好有好感,用過佢嘅化妝水都幾好,所以好期待佢嘅功效。雖然唔係日日用同全面用,但其實 15ml 係用得好快呢。質地有 95% 似水,好快吸收,勁清爽,感覺唔錯。功效方面,我係未試清楚嘅,因為用咗三分之一左右竟然俾我唔小心倒瀉咗,得返幾滴,真係喊出嚟!雖然唔貴,但咁樣真係好浪費呀!

▶ 用極都用唔完嘅 Crabtree & Evelyn Hand Cream,雖然 25g 細細支,但每日剩係用一次嘅話,其實係可以用好耐架!今日用邊隻味好呢?

▶ 陪咗我一年幾嘅 Clinique 聲波淨透潔膚儀竟然壞咗!充電時依舊著紅燈,但開機就冇反應。由於有兩年保養期,所以我帶同收據、潔膚儀、包裝盒及充電器等所有配件去 Clinique 門市,職員檢查後確定部機真係壞咗,最後換咗部全新潔膚儀俾我。但如果過咗保養期就冇辦法了,唯有買過部。希望今次唔好壞啦!

▶ 好少開架化妝品會令我有回購嘅衝動, The Balm Sexymama 係其中一樣。今次喺 Sephora 網店買,售價 HK$168 ,係好合理嘅價錢!

---------------------------------------------------------------------------------------


以下是所有文章總覽,正在持續更新中:
【自助遊記】我在國外的飲食日誌及行程規劃
【100%非廣告】我在香港的飲食地圖.內附毒舌食評
【100%誠實用後感】美妝及保養控必看!我的自購及空瓶分享
【其他】網購生活.有趣活動.日常雜事⋯⋯
【Facebook文章總覽】彩妝保養.飲食.旅遊.生活記事……

Follow me ▼

*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
Email ▶ fisherpigkt@gmail.com
Blog ▶ http://www.fisherpig.com/
Facebook ▶ https://www.facebook.com/fisherpigkt/
Instagram ▶ https://www.instagram.com/fisherpigkt/
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*

Comments