【Facebook文章總覽】飲食.食評(2017.Vol. 2)


.本文會收錄20篇在面書專頁的帖文
面書專頁的帖文不會跟本Blog的文章重複
.文字順序為圖片的左上→右上→左下→右下
---------------------------------------------------------------------------------------

▶ 原來台式飲品已經進化到有芝士奶蓋啦!歇腳亭嘅起司奶蓋綠茶,聽個名都覺得伏,但好想知佢伏到咩地步,所以買嚟試吓。原來飲落都唔錯,奶蓋綿密細膩,帶有微微鹹香;加上淡淡芝士味,有少少似食緊 cheese cake。配搭綠茶清清哋,同奶蓋 balance 返,所以飲完成杯都唔會覺得好濟。順帶一提,珍珠Q彈但冇乜味,都係天仁茗茶嘅珍珠好食啲!

▶ 【點解人大咗反而愈嚟愈少食放題?】細個覺得食放題好抵,百幾蚊可以食到好多唔同種類嘅嘢;但大個咗反而愈嚟愈少食,最近終於知道點解……
早排同屋企人食兩小時日式放題,始終成兩年冇食過,所以好多嘢都唔同咗:價錢由百幾蚊一位變做HK$250、食物種類多咗,又有哈根大師雪糕,仲出埋磯燒放題⋯⋯
但冇變嘅係,一坐低都係瘋狂剔剔剔同俾單,然後嘢食係咁送嚟。由於上菜快過食野,又想快啲清走碗碟上嘅食物騰空枱面位置,所以要 keep 住食食食,野都唔得閒講。最後只好同侍應講 cut 單食唔切,呢個時候先得閒傾計。
當第一輪食得七七八八後,開始第二輪 order,叫返第一輪冇嚟同埋要 encore 嘅野,由於第一輪食得太急同太多,所以戰鬥力大大減少。最後,第二輪差唔多食到尾聲時,就要 last order 同埋單了。
以上係我最近嘅放題體驗。幸運係食物質素中上同上菜速度快,冇乜漏單,服務仲幾好添。不過我同屋企人唔係大胃王,基本上食左第一輪已經飽左七成,所以計落唔係食咗好多,抵唔抵食就見仁見智。
雖然滿足到個胃,但感覺總係差啲嘢。我覺得食物、地點、人物係一餐飯嘅主要因素,當中以人物尤其重要。有時同舊朋友聚會,起碼幾個月先夾到時間見一次,所以更加珍惜每一餐飯,唔止係食,希望可以同大家傾計交流吓。如果要食到咁趕急,我寧願俾多少少錢去間可以慢慢食同傾計嘅餐廳。大概呢個係我愈嚟愈少去放題嘅原因。

▶ 粟米筒絕對係一種令人食上癮嘅零食!呢隻喺 7-11 買嘅包裝粟米筒係粟米濃湯味,食落脆卜卜,帶有少少鹹味,有幾分似飲緊粟米湯,話咁快就掃哂成包嚕!

▶ 原味同紫菜味嘅宅卡B薯條已經好好食,原來宜家仲出咗蜜糖味。近年咁 hit 蜜糖味薯片,連薯條都有蜜糖味,緊係要試吓!一盒有5小包,薯條保持一貫水準,都係厚實脆卜卜;蜜糖味唔算太突出,唔會好甜,仲食到有牛油香味,味道不錯。如果每包份量可以多少少就好啦!

---------------------------------------------------------------------------------------

▶ 韓國樂天出品嘅 Tiramisu 雪糕,令人超期待🤗最頂層嘅可可粉味道最突出;中間嘅芝士味一般,唔算好濃郁;最「特別」係,底層係比較硬嘅麵包口感,同平時食開入口即溶嘅蛋糕有啲分別。C先生好似對呢個「麵包底」有啲意見。但我覺得還好啦,因為食落有啲韌韌哋,感覺幾得意。

▶ 舊年年頭去台灣旅行(係呀又係去台灣)時,買咗小林煎餅超值分享包,NT$120有7種口味嘅煎餅,最啱買返公司做手信。當中我覺得海苔煎餅最好食,煎餅質感有啲似蛋卷,但口感偏硬,海苔味好明顯,所以年尾再去台灣時買咗海苔捏合煎餅自私食,成罐煎餅相當滿足,size 比超值裝細塊,只售 NT$135,係值得推薦嘅台灣手信!

▶ 原來大澳除咗有炭燒雞蛋仔、茶果同豆腐花,仲有長洲大魚蛋?!喺大澳賣長洲大魚蛋係咩玩法?

▶ 【全新NESCAFÉ® SHAKISSIMO® 搖出咖啡新感覺】就咁見到個廣告,真係望唔透搖支咖啡有乜用🤔原來搖吓搖吓就搖到啲泡泡,好似平時喺 Coffee Shop 飲到嘅 Cappuccino 咁,雖然呢個 concept 怪怪哋,但我覺得幾好飲喎。撇除佢偏甜,feel 到佢個口感同其他雀巢咖啡好唔同,係比較幼滑細膩,所以口感有驚喜。

---------------------------------------------------------------------------------------

▶ Greek Yogurt on Green / Blue Monday:)

▶ 其實我好鐘意乳酪飲品,酸酸甜甜唔會好膩,所以當知道維記出咗全新乳酪飲品後,即刻買哂原味同青蘋果味試飲。品牌聲稱「採用 100% 新鮮牛奶製造,百份百天然,無添加人工成份。每包含有660億活性乳酸菌,更添加 FOS 低聚果糖益生元,有效促進腸道健康。」聽落好似好健康,但一睇營養標籤即刻暈低。以原味嚟計,每 100ml 飲品就有9.9g糖。呢包嘢有成 220ml,即係總糖分超過 20g。其實飲落佢唔算偏甜,都幾好飲架。但由於最近開始為健康著想,平時出街食嘢已經唔健康,只好喺其他方面入手,例如少飲支裝及包裝飲品,所以唔可以飲咁多維記乳酪飲品呢!

▶ 最近先發現合味道杯麵出咗叻沙味,見佢咁特別就試吓啦。雖然我唔係食過好多次叻沙,但我印象中嘅叻沙應該係有椰香同少少辣味;而合味道叻沙味比較辣,雖然湯底比較「 milky 」,但冇乜椰香,所以唔係好聯想到佢同叻沙有關係。

▶ 話說某一個麻雀夜。有珍珍同卡樂B燒烤味薯片擺喺我哋眼前,但大家偏向食卡樂B,反而對珍珍無感。其實有冇人同我一樣都係珍珍燒烤味薯片嘅 fans /鐘意珍珍多過卡樂B燒烤味薯片?

---------------------------------------------------------------------------------------

▶ 日日返工都掙扎喺飲咖啡同唔飲咖啡之間,全因我搵唔到咖啡嘅代替品。最近總算買咗咖啡以外嘅飲品 - 点点綠 100% 有機豆漿粉,希望能藉此忘記咖啡。產品聲稱由100%非基因改造有機優質大豆磨成粉末,而且冇添加糖。每份食用份量有 2.2g 糖,唔係好多,所以飲落冇屋仔豆漿咁甜。我有時會加埋点点綠有機黑奇亞籽落豆漿,含豐富膳食纖維,好似健康啲,希望我真係堅持到飲豆漿,從而飲少啲咖啡啦!

▶ 之前去 HKTVmall 買嘢時,送咗杏仁及椰子味鈣思寶各一。由於一般紙包飲品糖份偏高,所以一開始會擔心呢兩款新口味會唔會偏甜或味道好假。先講杏仁高鈣,我係好唔鐘意食杏仁類甜品及飲品,總覺得好大陣藥味。但鈣思寶嘅杏仁味係好淡,係可以接受嘅範圍,仲覺得幾好飲(杏仁愛好者應該感到失望);至於椰子高鈣,椰子味唔算十分突出,感覺比杏仁味甜少少。兩隻味道唔會好假,所以我都好滿意!

▶ 收到朋友嘅韓國手信,點解可以全部都咁好食?
1. 左上係值得回購嘅 Double Crunch Bar ,之前有介紹過
2. 右上同左上好似,都係脆脆朱古力,不過拖肥感比較重,會「痴牙」啲
3. 最底嗰個係魚仔形狀嘅 Moist & Chewy Cake,入面有少少好似朱古力嘅餡,口感似海綿蛋糕,但多咗一種煙韌嘅感覺,好得意

▶ 早排喺屈臣氏買嘢時,無啦啦送咗盒丹麥藍罐玫瑰花味紅桑子巧克力曲奇,藍罐曲奇就見得多,咁少女風嘅曲奇都係第一次見。因為最近幾鐘意食玫瑰味甜點,所以好有興趣試吓丹麥藍罐嘅其他成員。個盒其中一格係心型曲奇,貌相幾好,餅乾口感同朱古力曲奇差唔多,食落有種好似士多啤梨嘅味道。玫瑰味唔突出,但我覺得好適合配埋花茶做下午茶。話咁快已經食哂,其實可以喺邊度買?

---------------------------------------------------------------------------------------

▶ 十字牌今年有好多新搞作,繼綠茶、白朱古力同紫薯,最新產品係地道奶茶,聲稱係真正茶餐廳口味,我覺得佢茶味 OK,唔會好澀;飲落唔係好甜(但睇返營養標籤,糖份其實唔算超低),至於奶味就唔算好突出,係好過之前出嘅綠茶牛奶飲品嘅。

▶ Healthy lunch:
Grove - Roasted Beef & Mushroom with Honey Mustard Sandwiches
Nestle Dairy Farm - Skimmed Milk
Catalo - Crunchy Granola Banana Nuts Mix

▶ 森永出品嘅抹茶雪糕,茶味幾重,亦有淡淡嘅苦澀味,質地尚算扎實,但當然同 Via Tokyo 有少少距離。如果 Via Tokyo 有十分,呢隻抹茶雪糕應該有八分。

▶ 終於喺聖安娜揾到好立克軟心胚芽甜品杯。甜品杯分為四層,最頂層係好立克慕絲,之後係蛋糕及好立克軟心,最後係奶凍。一直期望佢會有濃郁嘅好立克味,結果有啲失望。好立克慕絲質地比較札實,但好立克味道唔係好夠;軟心嘅好立克味會突出少少,但都係偏淡。原味奶凍淡而無味,有啲可惜。

---------------------------------------------------------------------------------------


以下是所有文章總覽,正在持續更新中:
【自助遊記】我在國外的飲食日誌及行程規劃
【100%非廣告】我在香港的飲食地圖.內附毒舌食評
【100%誠實用後感】美妝及保養控必看!我的自購及空瓶分享
【其他】網購生活.有趣活動.日常雜事⋯⋯
【Facebook文章總覽】彩妝保養.飲食.旅遊.生活記事……

Follow me ▼

*-*-*-*-*-*-*-*-*-*-*-*-* -*-*-*-*-*-*-*-*-*-*-*-*
Email ▶ fisherpigkt@gmail.com
Blog ▶ https://fisherpigkt.blogspot.com/
Facebook ▶ https://www.facebook.com/fisherpigkt/
Instagram ▶ https://www.instagram.com/fisherpigkt/
*-*-*-*-*-*-*-*-*-*-*-*-* -*-*-*-*-*-*-*-*-*-*-*-*